Најголемиот приватен Универзитет “ФОН” и Стопанската комора за информатички и комуникациски технологии МАСИТ, денеска потпишаа Меморандум за соработка.
Со овој договор ќе се интензивира размената на искуства и знаења меѓу “Фон” и Бизнис заедницата, ќе се подобри квалитетот на практичните часови, а идната соработка ќе помогне и во прилагодување на програмите кон реалните барања на информатичките компании.
„Нашата обврска кон нашите студенти не завршува со дипломирањето, туку откако ќе им најдеме и работа. Ако ние направиме кадри кои ќе бидат веднаш прифатени во заедницата, нашиот “рејтинг” како институција многу ќе порасне. И затоа многу сериозно работиме од тој аспект, а корисни ќе бидеме и за Бизнис заедницата,со тоа што ќе имаат кадри способни за работа“, вели проф. д-р Оливер Илиев, декан на Факултетот за ИТ на “Фон”.
За Комората пак, во која членуваат 80-те најреномирани информатички компании, ваквата соработка е единствениот начин за создавање на квалитетни кадри кои по дипломирањето лесно ќе се снајдат на пазарот на труд.
„Самиот пазар ги диктира условите и барањата, Тие услови и барања мора да произлезат од некаде. Доаѓаат кај нас, ние ги пренасочуваме до Универзитетот, тие ги едуцираат кадрите, ги подготвуваат за тој бизнис- свет, ги доставуваат кај нас, а потоа ние ги земаме како кадри“, изјави Горан Митревски, претседател на МАСИТ.
“ФОН” е единствениот приватен универзитет кој досега потпиша меморандуми за соработка со сите државни универзитети,со повеќе меѓународни високообразовни институции и со над 100 фирми, кои веќе 3 години ги стипендираат најдобрите студенти.
Потпишувањето на денешниот Меморандум е чекор напред во овој процес.
